សម្តេចមហាបវរធិបតី ហ៊ុន ម៉ាណែត និងលោកជំទាវបណ្ឌិត អញ្ជើញមកដល់កម្ពុជាវិញហើយ ក្រោយបញ្ចប់ដំណើរទស្សនកិច្ចក្រៅប្រទេសរយៈពេលមួយសប្តាហ៍
(FN)៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា និងលោកជំទាវបណ្ឌិត ពេជ ចន្ទមុន្នី ហ៊ុនម៉ាណែត បានដឹកនាំគណៈប្រតិភូជាន់ខ្ពស់ អញ្ជើញមកដល់ប្រទេសកម្ពុជាវិញហើយ បន្ទាប់ពីបានអញ្ជើញបំពេញការងារក្រៅប្រទេសយ៉ាងមមាញឹករយៈពេលមួយសប្តាហ៍នៅប្រទេសចំនួន៣ អាស៊ែបៃហ្សង់ តួកគីយ៉េ និងកាហ្សាក់ស្ថាន។ វេលាម៉ោងជិត៦ព្រឹកស្រាងៗ ថ្ងៃអាទិត្យ ទី១៨ ខែតុលា ឆ្នាំ២០២៦នេះ យន្តហោះពិសេសរបស់ព្រះរាជាណាចក្រកម្ពុជាលេខ០០១ បានចុះចតលើទីលានអាកាសយានដ្ឋានអន្តរជាតិតេជោដ៏ប្រណីតរបស់កម្ពុជាដោយជោគជ័យ។ ក្រុមការងារបច្ចេកទេស បានម្នីម្នារៀបចំបច្ចេកទេសឱ្យយន្តហោះបានចតនៅទីតាំងដែលបានរៀបចំ។ យន្តហោះចតរួចរាល់ គណៈប្រតិភូអមដំណើរសម្តេចមហាបវរធិបតី និងលោកជំទាវបណ្ឌិត ក៏បានរូតរះចុះពីលើយន្តហោះ។ គ្រាគណៈប្រតិភូអមអញ្ជើញចុះពីលើយន្តហោះ ដូចទម្លាប់សព្វដងដែរ មន្ត្រីជាន់ខ្ពស់រាជរដ្ឋាភិបាលកម្រិតឧបនាយករដ្ឋមន្ត្រី មេទ័ព មេនគរបាល អភិបាលខេត្តកណ្តាល បានអញ្ជើញរង់ចាំដំណើររបស់សម្តេចមហាបវរធិបតី និងលោកជំទាវបណ្ឌិត។ យន្តហោះចតរួចរាល់ ការរៀបចំទទួលដំណើរស្រេចបាច់ហើយនោះ សម្តេចមហាបវរធិបតី និងលោកជំទាវបណ្ឌិត បានអញ្ជើញចាកចេញពីយន្តហោះ។ បើទោះបីមួយសប្តាហ៍កន្លងទៅមមាញឹក ធ្វើដំណើរពីប្រទេសមួយទៅប្រទេសមួយទាំងយប់អាធ្រាត្រ ថាមពលចំណាយច្រើនយ៉ាងណាក្តី តែថាមពលផ្លូវចិត្តមិនស្រកស្រុតនោះឡើយ។ សម្តេចមហាបវរធិបតី និងលោកជំទាវ បានចាកចេញពីយន្តហោះដោយស្នាមញញឹម ស្នាមញញឹមដែលបាននាំមកនូវផ្លែផ្កាជាឧត្តមប្រយោជន៍សម្រាប់ជាតិ និងប្រជាជនតាមរយៈដំណើរបំពេញការងារមួយសប្តាហ៍កន្លងទៅនេះ។ ផ្លែផ្កានៃការពង្រីកទំនាក់ទំនង និងកិច្ចសហប្រតិបត្តិការបន្ថែមជាមួយប្រទេសជាមិត្ត ដែលមិនមានទំនាក់ទំនងកាលពីពេលមុន ជាពិសេសប្រទេសកាហ្សាក់ស្ថានដែលមិនធ្លាប់មាននាយករដ្ឋមន្ត្រីកម្ពុជារូបណា បានបំពេញដំណើរទស្សនកិច្ចនោះឡើយ។…